قصة عزمت حماتي كاملة

حكايات كوكى سامح 
يا بنات لو انا غلطانه قولولى انا عروسه وده اول رمضان ليه فى بيتى وانا ساكنه فى محافظه تانيه
عن المحافظه اللى فيها بيت اهل زوجى
زوجى كان عازم حماتى وحمايا وسلايفى على الفطار اليوم فأنا عملت سمك بلطى وجمبه كذا نوع سمك وغير جمبرى ورز وسلطه وبطاطس محمره المهم يا بنات حماتى اول لما دخلت قعدت تقول امام سلايفى ان ريحه الشقه زفاره
رغم انى كنت رشه معطر وشقتى اصلا جديده وريحة العفش واضح انه جديده
ده انا لسه عروسه مكملتش كام شهر وطبعا انتم عارفين ريحه شقه العرايس

المهم قبل ما المغرب يأذن بعشر دقايق انا حضرت الاكل وكان لسه الرز عالنار
لقيت حماتى بتطلب من سلايفى يقومو يجهزوا معايا الاكل
واللهى يا بنات سلفتى دخلت معايا المطبخ ولما شافت السمك فضلت تضحك ولما سألتها قالت بضحك عادى واللهى انا اضايقت بس عديتها وجهزنا الاكل وعلى المغرب حماتى صلت ولما خلصت الصلاه هى وحمايا وشافت الاكل كأنها شافت عفريت وبقت تقول ايه القرف ده
وزعقت فى زوجى وزعيق جامد وتقولو انت عارف انى مبحبش السمك وبقت تكرر الكلمه وانا كنت واقفه واللهى فى نص هدومى
ومش عارفه اتصرف ازاى واتحرجت جدا
وتقول انا جاية من آخر الدنيا عشان تطردونى انت والمحروسه مراتك 
وسلايفى كانوا بيضحكو عليه لأنها كسفتنى ومفطرتش وانا قعدت اتحايل عليها تفطر مرضتش ابدا وحلفت وزوجى قال لسلايفى واخوته يقعدو ياكلو وهو هيتصرف مع حماتى 
رفضوا وقعدو جنبها بدل ما واحده فيهم تقول كلمة حلوه هى و لا زوجها بالعكس دول وقعو الدنيا ما بينا بكلامهم وانها مش بتحب السمك 
واتريقو اننا قاصدين مياكلوش مع ان عرفت ان حماتى بس اللى مش بتحبه وحمايا وسلايفى عادى بس مأكلوش ومشيو زعلانين وبعد ما مشيو بتكلم مع زوجى وبقولو عيب اللى حصل 
قالى انتى اللى غلطانه ازاى تعملى سمك وانتى عارفه ان امى مش بتحبه 
بقولو وانا هعرف منين وخصوصا ان بالليل قولتلك هعمل سمك وانت معلقتش عليه راح نازل عليه وضربنى بالقلم ومن شده الۏجع ضرسى اټعور انا اول مره اتهان واضرب 
ده ابويا الله يرحمه عمره ما ضربنى و لا حتى امى مدت ايدها عليه ليه هو يعمل فيه كده مع انى مغلطتش ودلوقتى انا تعبانه ومتضايقه 
مش عارفه اقول لماما ولا اعمل ايه 
ولو قولت لماما الموضوع هيكبر واعمامى هيدخلو 
ممكن اررد بسرعه بالله عليكم عشان على أساسه هتصرف واكلم ماما